٣٠ سنة يا ناس

أعلِّم ولاد الناس

ومرتبى مكسوف

لينكشف ع الناس

٣٠ سنة تباشير وسبورة

وكل عام تتكرر الصورة

.....كان زمانى أمير......

.....لو بلعب الكورة......

٣٠ سنة امتحانات

٣٠سنة رحلات

ملاليم ف الانتقالات

٣٠سنة امتهانات

٣٠سنة بشرح

وقد ما بفرح

٣٠سنة بحزن

معتش فيه مطرح

٣٠سنة مناهدة

مناحية ومجاهدة

حصة ورا حصة

الدنيا أهى شاهدة

٣٠سنة تخريج

جد مش تهريج

ندعى رب كريم

للهموم تفريج

٣٠سنة تدريس

آخرتها يابا سويس

سرحنا أهو بالغنم

ما كبرنا ع التدبيس

ولو طلعت سليم

اخد معاش ملاليم

ولو طلبت أزيد

يتقال عليا لئيم

٣٠سنة بنقول

مفيش سماع للقول

ربك كريم ستار

نتمنى ستره يطول